兒童發展配對基金每年都會舉行頌歌節，一班小朋友趁聖誕將至，喺港九新界不同熱點唱聖誕歌，今日(22日)就輪到喺中環一個商場舉行。財政司司長陳茂波、港鐵主席馬時亨、證券及期貨事務監察委員會主席唐家成、保險業監管局主席鄭慕智都有出席，仲同小朋友齊齊唱歌添。

今日咁啱係冬至，馬時亨就被問到，做冬會唔會煮飯畀屋企人食，點知馬時亨就話自己少煮嘢食，如果佢煮嘅話，「唔好話做冬，飯都冇得開」喎。

唐家成就同孫女一齊出席活動。唔知孫女係覺得攰定詐嬌，唐家成一直揹住孫女，連上場時都冇放低，認真溫馨。陳茂波就話自己連續7年出席呢項活動喇。