【明報專訊】特首選舉期間不時傳出「3JT」嘅新聞，包括係咪組成聯盟咁，雖然至今無發生，但係3JT其實不時走埋一齊，好似民建聯創黨主席、立法會前主席曾鈺成（Jasper Tsang），就搵埋另外兩個「JT」自由黨榮譽主席田北俊（James Tien）同前財政司長曾俊華（John Tsang），一齊合唱聖誕歌，拍片上facebook為慈善出力，仲話「一個like又多一蚊雞」。

其實舊年聖誕，曾鈺成喺fb上載短片，唱聖誕歌為「兒童發展配對基金」籌款，一人分飾3角；今年就同另外兩個JT一齊為基金籌款，佢哋揀咗唱We Three Kings。田北俊講到明，曾鈺成叫到，佢「梗係肯做」，「我做立法會議員咁多年嚟，淨係聽一個人說話㗎啫，就係主席」；曾俊華就話曾鈺成「特登揀呢一首歌係無咩特別嘅意思」，叫大家唔好有任何誤會。

片中3JT合唱第一節後鏡頭一轉，曾鈺成變身聖誕老人，同戴上飾物嘅曾俊華同田大少輪流唱另外幾節。